Hafan / Astudio Gyda Ni / Modiwlau & Amserlen / Cyflwyniad i Gynhyrchu Cyfryngau
Cyflwyniad i Gynhyrchu Cyfryngau
Bydd y modiwl hwn yn eich cyflwyno i dri cham craidd cynhyrchu cyfryngau: cyn-gynhyrchu, cynhyrchu ac ôl-gynhyrchu. Yn ystod y cyfnod cyn-gynhyrchu, byddwch yn dysgu sgiliau cynhyrchu allweddol yn cynnwys addasu deunyddiau sgriptiau ar gyfer y sgrin, yn ogystal â chanllawiau cyfreithiol, cyllidebu ac amserlennu. Yn y bloc cynhyrchu, byddwch yn dysgu sgiliau ymarferol hanfodol ar gyfer y set neu’r stiwdio, megis sinematograffeg elfennol (camera a goleuo) a thechnegau cynhyrchu sain. Bydd y bloc ôl-gynhyrchu yn eich cyflwyno i’r technegau golygu sylfaenol ar gyfer trawsnewid ffilm fideo a sain amrwd yn doriad terfynol caboledig.
Amcanion dysgu
Wrth gwblhau’r modiwl hwn yn llwyddiannus, dylech fedru:
- Deall a dangos pwysigrwydd cynllunio a pharatoi’n drylwyr yn y broses cynhyrchu cyfryngau, yn ogystal ag ymwybyddiaeth o’r canllawiau cyfreithiol, moesegol a rheoleiddiol.
- Dangos a defnyddio gwybodaeth sylfaenol ac ymarferol o gyfarpar sain, camera, goleuo a golygu.
- Mynegi bwriadau creadigol a gwneud penderfyniadau sy’n briodol er mwyn gwireddu’r amcanion artistig hyn.
Sylwch oherwydd cyfyngiadau cenedlaethol mewn ymateb i bandemig COVID-19, ni allwn gynnig rhai elfennau o’r modiwl hwn yn ôl y bwriad. Mae pob elfen addysgu, gan gynnwys gweithdai ymarferol, yn cael eu cynnal ar-lein.
Rydym hefyd wedi addasu ychydig o gynnwys modiwlau i adlewyrchu’r sefyllfa gyfredol. Er enghraifft, ar gyfer y modiwl cyflwyniad i Gynhyrchu Cyfryngau, byddwch chi’n datblygu’ch cysyniad cyfryngau eich hun yn llawn, ac yn cael eich cefnogi i ddatblygu sgiliau cynhyrchu cyfryngau. Serch hynny, ni fydd disgwyl i chi gynhyrchu ffilm derfynol. Byddwn yn parhau i fonitro ac addasu yn ôl yr angen er mwyn cynnig addysgu a dysgu o’r safon uchaf i’n myfyrwyr.
Cynnwys
Mae’r modiwl yn defnyddio cyfres o ddarlithoedd wedi’u recordio, darllen dan arweiniad, taflenni gwaith a gweithdai ymarferol, gan ganolbwyntio ar y meysydd canlynol:
Rhestr o’r unedau
| Bloc 1 |
|---|
| 1. Datblygu Cysyniad a Dadansoddiad o’r Sgript: Naratif, Addasu, Byrddau Stori a Rhestrau Saethu |
| 2. Amserlennu a Chyllidebu: Lleoliadau, Taflenni Galwadau, Costau Uwch-y-Llinell/Is-y-Llinell |
| Bloc 2 |
|---|
| 3. Camera I: Fframio, Cyfansoddiad, Cydbwysedd Gwyn, Dinoethiad, Ffocws a Symudiad |
| 4. Camera II: Datblygu Sgiliau Camera |
| 5. Goleuo a Sain: Goleuo 3-Phwynt a Defnyddio Microffonau Personol a Bŵm |
| 6. Gwneud Ffilmiau’n Annibynnol: Sgiliau Cynhyrchu ar Waith |
| Bloc 3 |
|---|
| 7. Hanfodion Golygu: Y Rheol 180-gradd, Torri ar Symud a Fframio (y Rheol 30-gradd) |
| 8. Golygu Artistig: Pwyslais, Rhythm, Amrywiaeth a Phontydd |
| 9. Ôl-Sain: Recordio Deialog Ychwanegol (ADR), Foley, Sound FX a Lefelau |
Darlithwyr: Dr Laura Stephenson, Sara Penrhyn Jones
